السلام عليكم ورحمة الله وبركات
----------------------------------------------------
سأقوم بنقل حلقات برنامج برمج عقلك للدكتور شريف عرفة ارجو ان يفيدكم

برمـج عقلــك!!

د.شريف عرفة
-----------------------

أهلا بيكم في القسم الجديد ده من المنتدي (برمج عقلك)!

ممكن تستغربوا من العنوان الغريب ده... إيه برمج عقلك ده؟؟
ممكن واحد ييجي يسألني:
هو كمبيوتر ولامؤاخذة؟؟ يعني بدل ويندوز 98 ننزل إكس بي عشان مخنا يمشي أحسن ولا إيه يعني؟
تصدقوني إن هو هذا يبقى الموضوع بالضبط؟؟

تعال أسالك سؤال....

لو عندك كمبيوترين من نفس النوع واحد شغال بالإكس بي, والتاني شغال بالدوس.. حى تكون كفاءتهم وقدراتهم واحدة؟؟ طيب لو عايز تدخل موقع بص وطل... ينفع تستخدم الكمبيوتر أبو (دوس)؟؟
لأ طبعا.. عارف ليه؟ لأنك علشان تنجح في دخول الموقع لازم يكون عندك البرنامج المناسب... صح؟

فيه علم ظهر حديثاً اسمه البرمجة اللغوية العصبية.. (نقول برمجة العقل أظرف).. العلم ده قائم على فكرة إنك ممكن تعمل أي حاجة لو عرفت تبرمج عقلك بالبرنامج المناسب.. تخيل؟؟

يعني لازم تحط البرنامج المناسب في مخك عشان تعرف تستخدمه بطريقة أكفأ.. وتوصل للهدف اللي إنت عايزه.

تعال أسألك كمان كام سؤال....

عمرك حسيت إن اللي قدامك مش فاهمك وإنك مش عارف توصل له وجهة نظرك أو اللي إنت حاسس بيه؟؟
حسيت قبل كده إنك تايه ومش عارف تخطط لبكره كويس؟؟
لاحظت إنك مش فاهم والديك وإنهم مش فاهمينك؟؟
عمرك حسيت إنك متضايق كده من غير سبب ومش عارف تعمل إيه؟؟
عايز تطور قدراتك الوظيفية ومش عارف ازاي؟؟

أهي برمجة العقل بقى هي العلم اللي متخصص في حل كل المشاكل دي..

لو إجاباتك لمعظم الأسئلة اللي فاتت هي (أيوه).. إذن الجزء ده من الموقع حى يعجبك قوي....